Ang Gugma©

Ang gugma
Kung moabot na's kinabuhi
Kinsa ba gud ang magdumili
Pagtagamtam s'yang kalami?

Molanay
Ang kasingkasing nga nigahi
Mobuklad
Sama sa nainitan
Sa adlaw nga bulak.

Mao karon
Ang gibati niining dughan
Sukad nga ikaw akong nakit-an
Pasayloa kung kasingkasing ko
Nadani sa kaanyag mo
Ikaw na tingali
Ang binuhat alang kanako.

Dili balihon
Ko'ng mga kasakit
Kung makauban ikaw Pinangga sa hingpit
Apan pagkapait palandungon
Kung mahilayo sa imong pahiyom
Ikaw na gyud tingali
Ang gitagana alang kanako.

Kini karon
Ang gibati niining dughan
Sukad nga ikaw akong nakit-an
Maong pagkapait palandungon
Kung mahilayo sa imong pahiyom
Ikaw na gyud tingali
Ang gitagana alang kanako.

Paghukom Sa Panahon©

Mao na kini ang panahon
Nga angayan
Nakong paminawon
Ang nagkadaiyang mga sumbong
Sa kasingkasing
Kanako gisugilon.

Ug karon morag ikaw gyud
Ang giingon nga maoy pilion.

Bisan naglisud sa paghukom
Maoy nabati kong
Nahigugma gyud ako
Kung di ko kini pagasundon
Tingali mahayan ko'ng
Masayang nga higayon.

Kung sayop man ganing desisyon
Pagadawaton
Tanan angkonon
'Pan morag kalipay ko lang maangkon
Kung anaa ka
Sa kiliran ko.

Kay karon morag ikaw gyud
Ang giingon nga maoy pilion.

Bisan kung lisud kining hukom
Morag mas dili sayon
Kung talikdan ka sa dayon
Kay ngalan mo lang ginahunghong
Sa kasingkasing kong
Gihimo mong matahom.


*Music: Beyond; Lyrics: Bay Uray

Sumbong Niining Dughan©

Maoy sumbong ning akong dughan
Ikaw ang akong unongan
Sa kasakit o kapiskay
Sa kalisud o sa tumang kalipay.

Maoy hunghong ning akong dughan
Ikaw maoy katumanan
Mga damgo sa kanhiay,
Karon, hangtud sa ikamatay.

Tan-awa pag-ayo
Ang putli nakong paghigugma
Nga gitagana
Ko lang kanimo, Pinalangga.

Sud-onga pag-ayo'ng
Kalipay sa'kong mga mata
Nga maoy bunga
Sa imong gugma, Pinalangga.

Kung matapos na
King kinabuhi ko
Wala akoy mahayan
Kay ikaw, ako man.

Gihigugma Ka©

Gihigugma ka
Tanang oras
Sa pagmata
O pagkatulog man
Sa pagdamgo,
Pagbangon
O paglakaw.

Imo ang akong kinabuhi
Gitugyan ko kini sa hingpit
Busa paminawa
Kining akong pagtuaw.

Wala koy laing gahinan
Itugyan kong tanan kanimo
Hatagi nag bili
Kining akoang pagtuaw.

Wala na akoy
Lain pang gikinahanglan
Kondili ikaw
Kundi ikaw lang.

Gihigugma ka
Tanang takna
Sa matag pitik
Diri sa akong dughan
Samtang may gininhawa
Kasingkasing ko
Kanimo da.

Dili Ko Igsapayan©

Dili ko igsapayan nga matugaw
Niining kagabhiong mabugnaw
Kung ang tingog mo mapaminaw
Matambalang akong tumang kamingaw.

Kay wala ka sa kiliran ko
Kanunay'ng nagsubo
Balik nag hupaya king dughan ko.

Adlaw'g gabii nga dili makatulog
Nagahandum sa dagway mong matahom
Nagalakaw sa dalan 'pan walay tumong
Kanunay'ng gihanduraw'ng kagahapon.

Dili ko igsapayan nga mabuntagan
Magsud-ong sa maanyag mong larawan
Bisan pag moingon sila nga ako buang
Di moundang sa pagtawag sa imong ngalan.

Pauli na, O, hinigugma ko
Tumana ang saad mo.


*Music: Indonesian Song; Lyrics: Bay Uray

Gihandom Ko Kanunay©

Gihandom ko kanunay
Makita ka pag-usab
Magakos ug mahagkan
Kasingkasing ko itugyan.

Gihandom ko kanunay
Makauban ka pag-usab
Ug atong ugmaron
Atong gugma himoong balaanon.

Gidamgo sa
Kanunay ang mga
Higayon nga
Nakauban ka
Kasingkasing ko
Wala nagpanuko
Nga
Higugmaon ka.

Di tiaw nga
Pilion ka
Apan mag-unsa
Kung dili kita
Kasingkasing ko
Wala na nagsubo
Kay
Anaa ka na.

Ah...

Ubani Ako©

Ubani Ako
Sa akong pag-inusara
Ubani Ako
Sa akong kagul-anan
Ubani Ako
Pinaagi sa
Matuod mong paghigugma
Ubani Ako... Ubani Ako...

Kini lang
Ang akong ihangyo
Nga imo untang masabtan
Nga gikinahanglan ka
Ning kasingkasing kong nag-inusara
Pwede ba nga imo akong hatagan
Sa hangyo kong...

Ikaw lang
Ang matuod nga katagbawan
Ang tubig sa nag-uga kong galamhan
Tuohi ug dawata
Ning kasingkasing kong nag-inusara
Pwede bang tugyanan mo sa imong gugma
Ug...

Kini lang akong gipangayo
Bugtong bahandi nga naghatag
Kanakog kinabuhi...

Paminawa© (Mars)

Paminawa, paminawa
Paminawa una ako
Paminawa king tinagubtob
Sa nagping-it kong kasingkasing.

Daw sa nawad-an sa dalunggan
Nga kanhiay nipatalinghog
Nidasig sa pagbating
Morag wala nay kinabuhi.

Paminawa, paminawa, paminawa
Kining singgit
Kining akong awit
Sa pangindahay, paminawa!

Ngano ba sang ingon ana kana karon
Nga kung kanhi may kainit ang pagtagad
Daw sa karon
Nawad-an kana sa imong gugma.

Paminawa, paminawa, paminawa
Mahal ikaw kaayo
Isinggit kong akong gugma
Ania napagaw na...

Di Na Makalupad©

Morag langgam
Nga di na makalupad
Napiang sa imong pagbalibad
Sa gugma ko
Nga walay paglubad
Nga kanimo dugay na untang
Naghulat.

Kay kaniadto sa mga bata pa kita
Daw sa nabihag na sa imong kaanyag
Hangtud karon ikaw lamang gihapon
Ang nag-angkon sa gugma kong
Mapailubon.

Apan matud mo duna nay tag-iya
Sa kasingkasing mo
Duna nay nakauna.
Bisan og sakit dawaton sa hingpit
Apan ako nagpabilin nga...

Kay lagi ikaw lang ang gitinguha
Mga mata wala nay lain pang makita
Kanunay naghandum
Nga ugma puhon
Makapanag-iya kanimo ako gihapon.

Gisugot©

Gikutasan sa pagtikang
Padulong sa imong gisak-an
Kay napuno ang akong dughan
Sa kakulba ug kahinam.

Miingon ka kagahapon
Nga tubagon na nimo karon
Ang gugma ko nga naulipon
Sa kabuotan mo'g katahom.

Apan wala ka kuno sa inyong balay
Imo ba akong gibiay-biay?
Abi kog maangkon na'ng kalipay
Apan kanako ikaw milikay.

Gitunolan ako sa imong tagbalay
Sulat nga nagburot sa sobreng gamay
Gibukhad ko kini sa hinayhinay
Ug maoy nakita'ng imong hulagway.

Gibali ko kini, gisusi ang luyo
May gisulat ka nga di ko katuo
Matud nimo sukad pa kaniadto
Gitagana nang gugma mo kanako.

Mora kog gibayaw sa kalangitan
Milagubo pagkusog ang akong dughan
Labina sa imo nga gitug-an
Nga mahal mo usab ako's hilabihan.

Gipadayon pagbasa'ng imong sulat
Nagpasalamat ka's akong paghulat
Naglaum ka nga di kita magkabulag
Ug atong gugma di unta masaag.

La...la...la...
Daghan kaayong salamat... Uyab na ta!

Awit Sa Kinabuhi (Pahinungod Kang Bay Uray)© (Adbent)

Usa siya ka yanong tawo
Nga bag-o lang nahimamat ko
Kauban sa iyang amigo
Ang gitara nga maayong pagkatono.

Matag kaskas sa mga kwerdas
Ang mga nota iyang gipabanlas
Inubanan sa iyang tingog
Nindot nga awit ang atong madungog.

Dayon kamo mga higala
Awit sa kinabuhi saw-an ta
Ang kagul-anan isalibay na
Angayan lang kita nga magsadya.

Dayon kamo mga higala
Awit sa kinabuhi saw-an ta
Ang panagbingkil kalimtan na
Maangkon ang kalipay ug gugma.

Pamatia ang nagkadaiyang mga obra
Duyog sa iyang mga mugna
Matag lanog sa mga nagparada nga letra
Ang iyang gidalit hala tagamtama.

Siya tinuod tang higala
Andam kanunay motimbaya
Ginamit ang iyang gitara
Sa kagul-anan iyang lipayon ta.

Akong Mga Higala© (Adbent)

Naamguhan ko sa nanglabayng mga adlaw
Nga kalit sila kanako nahanaw.
Daw sama sa maanindot nga bangaw
Makadiyot lang nimo nga malantaw.

Kon ugaling may pagkuwang man
Angayan lang ba nga inyong talikdan?
Ug kon ugaling dunay kasaypanan
Paludhon ba ako sa inyong tiilan?

Bisan pa man sa atong nahiaguman
Kanunay kamong sulod ning akong dughan
Ug bisan pa man niining kalisdanan
Gihangad ko sa langit ang inyong kaayuhan.

Nagpanawag ako sa akong kalisdanan
Gihuna-huna ko kamo sa mga katam-isan
Gidumdom kanunay kadtong panag-uban
Ang gasa sa panaghigala atong gisaw-an.

Higala ko, kamo akong dalangpanan
Ayaw intawon isalikway ug talikdan
Sa mga pagsulay sa atong panaghigala
Maghiusa kita, mga babag buntogon ta!

Kasakit Ug Kamatayon© (Alan - Mars)

Ang kasakit bililhon sa nga tanan
Mas daghang kasakit
Mabati's kinabuhi...

Samtang ang kamatayon
Didto wala na ang tanan...

Wala ang sakit,
Wala ang kalibog,
Wala ang pag-antos,
Wala ang pagping-it...

Wala ang katam-is,
Wala ang kapait,
Wala ang kahuyang,
Wala ang kakulang...

'Pan wala sab ang gugma natong duha
Kay wala ako, wala sab ikaw...
Wala ikaw...

Asa na kamong mga gagmayng ginoo
Ning kinabuhing
Gibatunan.

Pun-i pa'ng kasakit nga gibati,
Pun-i pa'ng pag-antos nga gisagubang...

O kamatayon... kanimo...

Ihatag na kanako ang tanang mga sakit
Nga dili matukib sa kinabuhi...
Kung gusto nimo gukda ako ug lutusa
Kastiguha ug kung mahimo pa ilansang...

'Pan kon pwede pa, ayaw sa ko og patya
Kay gusto ko pa nga magakos
Ang akong gugma...

Pabatia Ako, Awiti Ako© (Mars)

Pabatia ako sa imong mga laylay
Pabatia usab ako sa linganay
Sa imong gitarang kanhi mo nang gikaskas
Aron pagsugilon sa gugmang malaumon.

Awiti na usab ako sa atong kagabhion
Awiti sa imong mga pangindahay
Sa atong paraiso nga puno sa kalipay
Uban sa dan-ag sa buwan nga atong kauban.

Balaki sa imong mga pulong
Ug sa sugilanon sa 'tong kinaiyahan
Isinggit, isangyaw'ng kaayuhan
Bisan sa kaparutan, ahay, akong nahiaguman.

Sulati ako sa 'kong pag-inusara
Ubani sa akong kagawasan sa gugma
Tagui sa paghubo sa 'kong kamatuoran
Nga ikaw lamang may pagsabot kanunay.

Awita Ang Awit Ko© (Adbent)

Pangandoy kong awiton kini
Damgo kong imong mabati
Tinguha kong mahalad kanimo
Ki'ng awit nga mugna ko.

Apan pangandoy lang gyud diay
Kay mga nota daw mitalidhay.
Pakyas kong ipabuhagay
Kining gugma nakong giatay.

Gisuwat sa lugas sa akong mga luha
Sa palad nga hapit madugta
Namugnang awit sa hunahuna'ng
Gagubat sa taliwala.

Ki'ng awit sa akong pakigbisog
Sa gugma nga way pagkabusog.
Padayon nga naglagubo
Ikaw unta makahibalo.

Palihog lang awita ang awit ko
Pahinungod ko alang kanimo.
Pasayloa kung di ko mahimo
Hangtod karon padayong nakigbugno.

Palihog lang awita ang awit ko
Awit sa gugma ko diha kanimo.
Ug kon mahimo nang abo
Maluoy ka, awita kini sa lubnganan ko.

Ubani Unya Ako© (Mars)

Ikaw kadtong hulagway sa kaanyag,
Ang hulagway sa matuod nga paghigugma.
Ikaw ang dagway nga kanunay nakong gihangad
sa akong kagabhion nga nag-inusara.

Lauman ta kadtong langit nga atong padulngan.
Didto way pagkalaglag ang balilinhan.
Ug ang kahayag nga way pagtunod sa kasadpan,
Ipasalig kong ubanan ikaw sa imong karon ug unya.

Kung aduna man gani katapusan ang tanan
Ug mahanaw sa kalibutan nga atong agian.
Palihug na lang og dan-ag didto unya sa atong ugma
Kung aduna pa man gani, ikaw, gihapon ang akong kauban...
Ang ikauban...

Kay bisan unsa'ng dangatan didto unya sa atong ugma
Kung aduna pa man gani, ikaw, ikaw gihapon ang tanyagan...
Sa akong gugma...

Ayaw Bakwia Ang Katahom© (Mars)

Nabati ko ang kahapdos sa kasing kasing
Sa matag tuyok sa akong hunahuna diha kanimo
Nganong ikaw pa ang natanom ning pag-inusara.

Buot ko nang mulingkawas, mamuhi kanimo apan
Nasayod kung kamatayon ko lang ang mahimong bugti
kung mahilayo sa tubig ug hanging gipahulaman.

Naanad na ako, nahimo kining kabahin sa pagkatawo
Apan unsa ang mahimo ning ulipon kung imo na'ng bawion
Bisan malisod giandam ko na'ng akong kaugalingon.

Balas Sa Imong Palad© (Mars)

Pwedeng mahigugma ka sa makadaghan
Pwedeng kumkumon nimo silang tanan
Pwedeng magpa-ulipon ka
Sa imong pagkahakog.

Ingnon ko ikaw daan
Dili maangkon ang tanan sa pagdali-dali
Mga butang nalatid na'ng mahitabo
Sa insaktong higayon ug rason.

Sama nianang balas nga imong gigunitan
Dili tanan magpabilin sa iyang nahimutangan.
Bisan pa gani sa pagpanglimbasog nimo'g hawid
Mahimong mulugnot ang uban ug mangatagak.

Ug mangapalid kini sa tayhop sa hangin,
Maong pagmata na ug pilia ang angayang
Mupabilin sa imong palad.

Kay usa ka lugas lamang ako
Nga nagyaka sa imong palad.

Dili Mahimong Talikdan© (Adbent)

Sa makadaghang higayon
Imong gilutos ug buot tapuson
Nagkamang sa yuta sa kawad-on
Nalubong sa lapok,
Nagpakiluoy nga haw-ason.

Bisan pa man niining tanan
Labot ka niining akong kalibutan.
Bisan abugon man sa makadaghan
Mobalik ako nganha sa imong tugkaran.

Karon ako nagpahilayo
Gibalong kasakit ug kasubo
Buntogong kahuyang nga nagtago
Giyahan unta sa langit,
Ako nangamuyo.

Buot ko man nga ikaw hikalimtan
Ilubong sa hingpit kadtong kapakyasan.
Apan bisan pa man sa 'kong nahiaguman,
Ikaw, dili og dili g'yud mahimong hitalikdan.

Benuristik© (Mars)

Wala ako mangandoy nga awitan mo,
Wala ako magdamgo nga iduyan mo,
Sa mga laylay
Sa akong pagkahinanok,
Igo na kanako nga anaa ka diha...

Bisan dili ko ikaw magakos
Bisan dili ko ikaw mahagkan
Bisan dili ko mahikap ang kamatuoran...
Igo na kanako ang mga pulong
Ug kahayag nga nagbinugtong
Dan-ag sa bag-ong kagabhion...

Wala ako mangandoy nga tutokan mo,
Wala ako mangayo nga sublian mo,
Sa mga pulong nga nagbaga
Sa akong kasingkasing,
Igo na kanako nga anaa ka diha...

Puol, Labad, Ug Balak© (Mars)

Puol gamay, labad ug dyutay
Sige ta'g balik balik, balak balak
Padayag sa atong butbot
Padugang sa pusta haron ingnong hawod.

Hahay, kanus-a pa kaha
Kitang tanan masayod,
Nga nakadugang kita sa gubot,
Naka-ali kita sa mga dalan
Mura sad ug mga sagbot.

Lalag na ug nangalarag,
Nagpalayo ang kalunhaw,
Naanod sa pangidaron
Nga gihagit sa adlaw,
Ayaw tuguti ang kaulaw.

Usahay maka-ingon lagi ako
Mas lami paminawon
Ang linaw nga baybayon.
Kanang wala gyuy balud
Bisan daghan ang gapnod,
Walay sulog nga moanod.

Alang Sa Taga-Kalubihan© (Mars)

Gisapnay ninyo kanunay
Ang mga pag-amping.

Gibuligan sa pag-amuma
Gitugutang mahimong lanog nga pulong.

Ilawom niining kalubihan
nga sa kanunay nakig-uban.

Sa mga nag-inusara'ng pakigbisog
Ug wala'y panon nga sarang tultulon,

Dako'ng pasalamat sa kalubihan
Nga nihatag sa tipik nga higayon,

Haron kini nga pundok sa mga pulong
Mahimong lanog nga lugaynon.

Diin mabati sa mga bungol
Na kaayong kasing kasing,

Nga nitikig na ug nigahi
Tungod sa pagkaulipon.

sa mga pulong sa kasikbit nga mga dapit
ug midaugdaog sa pagkagamay niini.

Pulong pa ni Bay Uray
Sa iyang mga awit,

Nga latagawtawan
"Dako ang iyang Gugmahanong Buwan!"

Bakaki Na Lang©

Kung nawala na'ng imong gugma
Ayaw lang sa pagsaba
Kay di ko pa makaya
Kung ugaling mobiya ka.

Makahulat ka pa unta
Og daghan pang mga takna
Sa di ka pa motug-an
Sa tanang sekretong imong gitagoan.

Sigurado gayud
Nga ako mabuang sa hilabihan.
Kung imo lang akong pakalitan
Sa pagsulti sa matuod
Nga sulod sa imong dughan.
Ma'y pa mamakak ka na lang
Kay dili pa ako andam.

Dugay na 'kong nakabantay
Nausab na'ng imong panagway.
Nawala na ang kanhiay
Mga matang puno sa kalipay.

Lahi na sab ang pahiyom
Di na sama sa kagahapon
Nawala na ang kainit
Sa imong halok
Ug gakos nga hugot.

Asa Kaha Kita Dalha© (Mars)

Asa kaha kita dalha
Sa atong mga damgo?
Asa kaha kita sugata
Sa pakiglimbasog?

Dihay higayon usa kita
Apan dili ikalimod
Nga dili kita mahi-usa pa
Sa tan-aw sa mahusgahong mga mata.

Apan ingnon, ingnon ko ikaw,
Andam na akong puy-an
Ang mga damgo, damgong naumol
Niadtong usa ka gabiing miawit ta.

Miawit mga kasing kasing
Sa kalipay nga hilabihan.
Dalha ako sa mga sumpay
Sa kahigayunan.

Sa Mga Bukton Mo© (Adbent)

Sa mga bukton mo
Nabati ko ang matuod nga pagpangga
Pagbati nga dugay ko nang gipangita
Og dinhi mo kanako gipakita….

Sa mga bukton mo
Nabati ko ang matuod nga paghigugma
Pagbati'ng tiunay og walay paglubad
Busa ikaw usab akong gimahal…

Sa mga bukton mo... malooy ka
Sa mga bukton mo... papahulaya ako
Sa mga bukton mo... alalaya
Ug palihog lig-ona ako...

Sa mga bukton mo
Nabati ko ang matuod nga kalipay
Pagbati nga dili mahimong isalikway
Binbinon ko hangtod sa ikamatay…

Sa mga bukton mo
Nabati ko ang matuod nga panaghigala
Pagbati ning dughan nga walay sama
Ug ampingan ko kini nga puno sa gugma…

Sa mga bukton mo
Nakita ko ang matuod kong pagkatawo
Gialim mong samad nga sa dughan kong nagsubo
Gisapnay ang mga luha sa akong pagbakho.

Ang Maglalangyaw© (Adbent)

Bug-at nga desisyon ang gipili
Aron maharuhay ang kinabuhi
Bisan kamingaw ang maong bugti
Molampos lang sa gilatayang pisi.

Ang mga gibati sa kaugalingon
Kini dili nimo panumbalingon
Alang sa imong mga biniyaan
Antoson mo na lang kining tanan.

Dili tiaw-tiaw ang paglangyaw
Hataas nga dalan imong ginalakaw
Madag-umon man ang imong nahagdaw
Malantaw mo rang bidlisiw sa adlaw!

Nahisama ka sa piniriso
Didto sa hawla nagpuyo
Uhaw sa duaw sa mga mahal mo
Mainit nga pagbating daw kalayo.

Sa pag-inusara sa kagabhion
Giihap mong mga bitoon
Dungan sa pagkislap ikaw miingon
Usa kaninyo ako rang maangkon... puhon...

Dili gayod sayon imong pagbiya
Apan kalisdanan ibaliwala
Pag-ampo nga'ng Diyos na ang bahala
Inubanan sa kakugi'g mga paninguha.

Duka Bersus Kalaay© (Adbent)

Gibati ko karon ang kalaay
Dinhi sa opisina nagtulo ang laway
Nagamug-ot akong panagway
Buot makig-hadla sa mga panuway.

Gilingaw ko nalang akong kaugalingon
Aron sa kalaay dili ako maulipon
Dakong bugno nga akong sagubangon
Nga angayan kong pagabuntugon.

Pastilan, pastilan, pastilan ang kinabuhi
Kinahanglan mag-antos aron mabuhi
Apan ngano man usab ang kinabuhing hayahay
Kulang sa katam-is, kulang usab sa kalipay...

Tibuok adlaw nga nakig-atbang
Sa mando og sugo nagpaabot lang
Nagsulat aron panahon di masayang
Inig singgit sa amo aron di usab makugang.

Kalaay og kamingaw ang kontra
Kung magpadaog, magpaulipon ka
Lamyon ka niini og ikaw matumba
Makawang lang ang imong paninguha.

Luyo Sa Entablado© (Adbent)

Sa matag gula ko sa entablado
Giduyogan sa daghang adorno
Matag-suok gilukop ko og paso
Abiba'g pagdayeg ang naangkon ko.

Pagpaambit sa abilidad ug talento
Mipahilak, mipakatawa's mga tawo
Sa kalingawang nahatag ko didto
Kalipayng gibati naghari's dughan ko.

Sa matagtiklop sa tabil sa maong entablado
Makita mo sa daplin usa ka anino
Didto sa suok nagabakho
Puno sa kasakit akong pagkatawo.

Buot ko mang hunongon kining tanan
Dunay nagtukmod ug gipaundayonan
Padayong gikab-ot ang mga kabitoonan
Bulawan nga entablado akong gipuy-an.

Didto luyo sa maong entablado
Sa matuod nga lumba ako nakibugno
Sa walay pagtakuban og pagtago
Nanglimbasog aron kadaugan maangkon ko!

Matuod Nga Kalipay© (Adbent)

Sa nangaging mga adlaw
Kaugalingon ko nagpakalingaw
Wala na panumbalinga
Ang akoang tumang kamingaw
Nahikatulog nga pagbati pirmi nang gatukaw.

Walay oras nga giusikan
Matag hagtok sa orasan
Dunay mga pulong akong gibuhian

Walay oras nga giusikan
Matag pitik sa akong dughan
Lain-laing mga mugna ang mahuna-hunaan.

Wala ko gayod kini mabantayi
Ang pagsubang sa adlaw og pagsalop niini
Didto sa akong lawak lamang ako nagpakabuhi
Sa paglanog sa tingog, balumbong ang bugtong saksi.

Dinhi ko nakita ang kalipay
Nga sa galamhan ko nakahupay
Alang kaninyo kining akong ginahikay
Sa kinasing-kasing og sa walay pagkalaay
Tungod sa panaghigala nato nga unta molahutay.

Salinsing Sa Dahong Laya© (Adbent)

Ang kaniadtong berding dahon
Mga yamog kanunayng nagtugdon
Bisan ang makolor nga alibangbang
Kanimo pirming nagpaatbang.

Apan sa imong pagkalaya
Wala na sila motimbaya
Gipaabot lang ang pagtagak sa yuta
Og didto kutkuton hangtod mawala.

Salinsing, salinsing
Salinsing sa dahong laya.

Miabot gyod ang gikahadlokan
Sa paghapak sa hangin napukan
Didto sa yuta nahagba
Gilamoy hangtod nga nadugta.

Apan sa imong pagkapukan
Dunay mihulip sa nahimutangan
Salinsing sa bag-ong paglaom
Sa pagbuklad sa mga bulak nga matahom!

Pagsupak Ba O Pagsakripisyo© (Adbent)

Niadtong sayo sa kaadlawon
Giandam kong akong kaugalingon
Mingaw niadto ang palibot
Nga daw walay gustong
Manghilabot

Sa paglabay nako
Sa akong mga ginikanan
Walay bisan gamay'ng kasikas
Akong nadunggan
Buot ko mang tugawon
Ang ilang paghikatulog
Gipili ko na lang nga sila
Dili na matandog

Sa pagbiya ko
Sa among panimalay
Wala ko kapugngi
Ang mga luha sa pagbuhagay
Daw ang lawas ko ug kasing-kasing nalanay
Nangita og pwedeng kanako mosapnay

Matagtikang ko sa mga tiil
Nagpangurog ang akong mga ngabil
Nakahangad sa langit nakasangpit
Ginoo ko, giyahi sa maong dapit!

Dili man uyon sila sa akong pagbiya
Sayod ko nga kaayohan ilang gihuna-huna
Ki'ng gibuhat ko, pagsupak o pagsakripisyo?
Ang gipili ko, maong pagpahilayo!

Kini laging kabus lang kita intawon
Mangita og mas lunhaw nga sibsibanan. Oh...

Saw-an Ta Higala Ko© (Adbent)

Wala ko damha ug paabota
Nga mag-krus ang mga dalan ta
Sa dugay nga panahong nagpakahilom ka
Karon mibalik na ang atong panaghigala.

Managsama ang lumba nga atong giapilan
Pakigbisog, pagsakripisyo nga hilabihan
Pagsulay, kamingaw, kahingawa'g kalisdanan
Ki'ng tanan buntogon aron makab-ot ang kadaugan.

Kung bation mo na'ng kahuyang og kakutas
Andam kog taganang sundon ang 'mong gibaktas
Saw-an ta kini, hupayon og ibanlas
Aron niining kangitngit kita malingkawas!

Sayod ko nga lig-on ang imong mga dapat
Madaog ang mga hagit nga kanimo misugat
Dawaton mo kini bisan pa man og mabug-at
Matam-is mong pahiyom kanako imong isugat!

Luyo Sa Matam-is Nga Pahiyom© (Adbent)

Pagkaanindot nga sud-ongon
Panagway mo nga mapahiyumon
Mga mata nga daw sidlak's mga bituon
Kanimo dunay buot nga moangkon!

Apan luyo sa imong pagpakaaron-ingnon
Nahiuban ka sa bisyo'g nagumon
Sa pagsukarap maglisod na og bangon
Mahimo pa ba kining bakwion?

Buot mo man nga hitalikdan
Og sa hangtod kini hikalimtan
Apan kini magpabilin
Kanunay sa handumanan
Aduna nay luna sa kahiladman!

Andam ka na ba sa maong pagbag-o?
Lig-on ka na ba's imong pagtoo?
Ikaw lang batok sa kaugalingon mo
Andam ka na ba sa dakong bugno?

Kining dakong bugno sa imong kinabuhi
Bisan pa man nga ikaw magdumili
Itisok pagbalik nag-inusarang binhi
Alimaha dakong kalipay'ng bugti!

Ang Tingog© (Adbent)

Tingog nga dako ug gamay
Tingog nga makapahupay
Tingog sa pagpabuhagay
Kanako dinhi makapalipay.

Usa ka tawag ang akong nadungog
Gihatod sa balod og sa sulog
Og didto ako nakigduyog
Pagbati akong gilamboyog.

Mga higala akong nahimamat
Sa kalubihan nag-agbat-agbat
Payag nga gitukod dili makurat
Sa unos ug bagyo dili malangkat.

Ug didto akong gipalanog
Pagbati nga dugay nang nahinog
Bisan tuhod ko nagpangurog
Ilang gisapnay aron makabarog.

Sa paglanog na sa akong tingog
Dunay namati'g nakadungog
Nisumbalik daw nga makabungog
Mga ka-Bisdak nato nakigduyog.

Tingog nga walay pagkapagaw
Tingog nga dili mahanaw
Tingog nga pirming mahanduraw
Tingog nga sa tanan mosangyaw!

Mga Balud Sa Luha© (Adbent)

Usa kadto ka maunos nga kagabhion
Makusog ang paghampak sa hangin
Mitaob ang dagat nga daw nagpanugon
Sa dili paglawig sa lawod kay basin maangin.

Bisan milikay na sa nagpangamay nga alimpos
Nalit-ag ako niini ug didto sa katubigan gibanlas
Sa akong gidangatan buot ako nga manimalos
Apan di ko na mahimo ang pag-ikyas.

Gilibutan ako sa makusog nga lilo
Nakigbisog aron di mahitumpawak
Dugang kusog kang Bathala ako nangayo
Dungan sa makusog nga paglugapak.

Mihayag sa kalit ang akong palibot
Ug didto ako sa kalit nahigmata
Nasayran ko na lang ang akong pag-abot
Gikang nakigbugno sa balud sa mga luha!

Gugmahanong Buwan©

Gugmahanong Buwan aduna akoy ihangyo
Kung mahimo ayaw sa pag-abot dinhi kanako.

Kay naghuot pa ang akong dughan
Nga giyam-iran sa babayeng gimahal!

Kanus-a ko pa man nga matagamtaman
Ang bililhong gugma sa akong pinalangga.

Pila pa man ka Pebrero ang ako nga paaboton
Aron masinati ko ang iyang pagtando
Sa gugma kong gipangayo.

Gugmahanong Buwan sa 'mong tabang nagkinahanglan
Kung mahimo lukmaya ang iyang dughan alang kanako.

Kay dugay na ako nga nangandoy
Nga makauban ning kiliran ang babayeng gimahal.

Gihimo na'ng tanan, garbo gibiyaan
Tungod kaniya nga akong pinalangga.

Nagpakilimos, tanan akong giantos
Tungod kaniya nga akong pinalangga.

Panamilit©

Di ta unta mahikalimtan
Mga gipanumpaan
Sa kasingkasing mo'g sa dughan ko
Saksi ang kahitas-an.
Ug kay magkalagyo man
Ato untang hibaloan
Nga kasingkasing mo'g ang dughan ko
Kanunay'ng mag-uban.

Busa sa dili pa ako mobiya
Ki'ng dughan ko baloni sa imong gugma
Kay wa ko nasayod kung kanus-a
Pa, sunod kita nga magkakita.

Busa pahiran tang mga luha
Nga miagas sa atong mga mata
Tungod sa kamingaw'ng hilabihan
Nga milamoy sa 'tong dughang gisakitan.

Unta sa matag adlaw
Maghinandumay kita
Kay kasingkasing mo'g ang dughan ko
Uhawon sa usag-usa.
Ug kay magkalagyo man
Ato untang timan-an
Nga kasingkasing mo'g ang dughan ko
Di pwedeng itugyan sa uban.

Busa sa dili pa ako mobiya
Pun-a ako sa 'mong pagpangga
Busa ako gaksa na
Kay akong pagbalik dugay pa.

Bisan Unsa Lang©

Bisan kinsa lang
Sa ibabaw ning kalibutan
Basta malingaw
Ang kasing-kasing nga gimingaw.
Bisan kinsa lang
Sa ibabaw ning kalibutan
Ang akong pasidunggan
Ning duyog kong
Alang sa tanan...

Bisan unsa lang
Ang mahunahunaan
Himoan dayon og kanta
Ug sa gitara pagaduyogan.
Bisan unsa lang
Ang mahunahunaan
Aron mahatagan
Og katagbawan
Kamong tanan...

O... Kamong tanan...
O... Mga silingan...
O... Sa ngatanan...
Sa ngatanan...

Buntagay©

Bun-bun-bun-tagay!
Bun-bun-bun-tagay!
Bun-bun-bun-tag---ay!

Buntag, udto, hapon, gabii...
Inom, inom, inom...om, om , om...

Buntag, udto, hapon, gabii...
Kilaw, kilaw, kilaw...aw, aw, aw...

Buntag, udto, hapon, gabii...
Videoke, videoke, videoke...ke, ke, ke...

Buntag, udto, hapon, gabii...
Away, away, away...ay, ay, ay...

Hunong Sa Pagpahimulos©

Hunong, hunong na
Sa pagpahimulos
Sa mga igsoon
Natong kabus...

Hunong, hunong na
Sa pagpahimulos
Ayaw na dugangi
Ang ilang pag-antos...

Ang katilingban nga nahigmata
Dili motugot sa mga inhustisya.

Kamong Hudas sa katilingban
Undangi na'ng pagpanamastamas
Sa katawhan...

Hunong, hunong na
Sa pagpahimulos
Sa kabuhatan
Sa Diyos...

Kalainan Sa Panahon©

Ang kinabuhi nato sa kalibutan
Malipayon gani, panahon kusog modagan.
Kung masulob-on, morag wa nay katapusan.

Namatikdan mo ba
Nga kung magkuyog mo
Sa imong pinalanggang hinigugma
Ang pagligid sa oras paspas,
Kanunay kamong mag-apas.

Namatikdan mo ba
Kung di mo magkakita
Ang usa ka oras
Morag semana ka taas.
Ang pagligid sa matag takna yaya,
Pulos kamingaw, walay pagmaya.

Kinabuhing Batan-on©

Sauloga ang kinabuhing batan-on,
Lumalabay lang kining higayon.
Ampingi ang kinabuhing batan-on,
Timan-i nga kini bililhon.

Tun-i, tun-i
Ang kinabuhi samtang may panahon.
Batoki, batoki
Ang mga bisyo nga malinglahon.
Batoni, batoni
Ang mga hiyas nga dalaygon.
Ayaw kawangi sa kaayo
Ang kaugalingon.

Lantawa, ang kinabuhi mo
Sama sa adlaw'ng misubang sa kabuntagon.
Ang kahayag ug kainit mo
Nagdala og paglaum.
Sa kanunay imo untang subayon
Ang dalan sa katarong.
Ug patalinghogan ang imong kasing-kasing
Sa iyang mga hunghong.

Lalim Ba©

Kung kamo ba'y mahigugma,
Lalim ba? Lalim ba?
Kung kamo bay mahigugma, lalim ba?

Kung kamo ba'y mahigugma,
Lalim ba? Lalim ba?
Kung kamo bay mahigugma, lalim ba?

Kung kamo ba'y mahigugma,
Lalim ba? Lalim ba?
Kung kamo bay mahigugma, lalim ba?

Kung kamo na sab unya ang mahigugma,
Hinumdomi ninyo kining awita...

Makalibog Ang Gugmang Makalibog©

Puslan man nga walay nagmahal kanako
Iagi ko na lang ang tanan sa pag-inom ug pagbakho.
Dili manudlay, dili maligo, bahala nag manimaho
Kay nagsakit ang akong dughan sa kasubo.

Hoy Undo ayaw kabalaka
Ania ko nga kanimo nagpangga.
Wala ba nimo namatikdan
Nga ako kanimo ganahan?
Nganong siya man
Ania man kos imong kiliran?
Busa undang na sa paghilak
Ayaw usiki ang imong mga luha.

Puslan man nga ikaw Inday wala nagmahal kanako.
Iagi ang tanan sa pag-inom ug pagbakho.
Dili manudlay, dili maligo, bahala nag manimaho.
Kay sakit ang akong dughan sa kasubo.

Hoy Manoy ayaw kabalaka
Naa man ang akong lolang biyuda.
Wala ba nimo namatikdan
Nga siya kanimo ganahan?
Nganong ako man
Nga kabata ko pa sa ngatanan?
Tabangi hinuon ako
Imong apo kanako makagusto.

Nag-Ow©

Kalaming baktas-baktason ang lapyahan
Kaanindot sud-ong-sud-ongon ang tubig sa kadagatan.
Kamaayo ra untang salom-saloman
Ang dagat nga duol sa tugkaran...Apan...

Naay nag-Ow Ow Ow Ow Ow
Ow Ow Ow Ow Ow Ow Ow Ow
Ow Ow Ow Ow Ow Ow Ow Ow Ow Ow Ow

Kalaming ligid-ligiran ang puting kabalasan
Kapreskong simhot-simhoton sa baybayon ang kahanginan,
Kamaayo ra untang salom-saloman
Ang dagat nga duol sa pantalan...Apan...

Nanimahog Ow...
Nilutaw ang Ow...
Likay kay naay Ow...
Ow....

Sugta Na©

Kanunay'ng nagduka apan dili makatulog.
Naghuna-huna sa himsog nimong pamarog.
Kanus-a pa kaha ikaw, kanako mahulog?
Sugta na aron di na mahubog!

O Inday, paminawa
Ang tingog ko nga gakurog.
Misaad kanimo
Sa gugma ko nga way libog.
Ug mihalad sa akong dagway,
Kasing-kasing ug bukog.
Tambali na, di na maagwanta
Kining kaibog!

O Inday, tan-awa
Akong pagsungsong sa sulog.
Nagpadayon, nanglimbasog
Bisan ang ugma galubog.
Kanus-a man sa halok mo matagbaw'g mabusog...
Pag-abot na ba sa Buwan sa Irog-Irog?

Sugta na aron na mabaskog...
Sugta na aron na makabatog...

Tapulan©

Nganong magpunay'g
Tikongkong
Taas na
Ang adlaw karon...
Nganong dili man
Mobangon
Daghan pa
Ang tulumanon...

Ang tawong tapulan
Dili gayud ganahan
Motimbakowas
Sa higdaan.
Mobangon lang
Aron mokaon
Inig human
Matulog na sab dayon...

Kung momata man
Di sab nimo makit-an
Sa imong tugkaran...
Tua hinuon sa imong silingan
O didto sa tubaan...

Mora man gayud og adunahan
Magsalig lang diay sa uban...
Magyampungad lang sa mga sugalan
Panimalay gipasagdan lang...

Nganong magpunay'g tikongkong
Dili man bugnaw ang panahon...
Nganong dili man moangkon
Sa imong mga tulubagon...

Tumang Kainit©

Tumang kainit... Kainit...kainit…
Nabuang na ang kalibutan
Sa kainit
Kainit... kainit... kainit…
Kitang tanan maoy
Hinungdan sa kainit.

Mga pabrika sigeng gabugag
Hugaw nga aso;
Mga sakyanan sigeng gaitom
Ang tambotso,
Unsaon man nato sila
Pag-alibyo?

Gipamutol ang kakahoyan
Sa kalasangan;
Nangasunog sa kaingin
Ang uban,
Unsaon man sa pagsumpo
Niining tanan?

Karbon ug gasolina
Sa industriya;
Sila maoy nagpainit sa 'tong planeta,
Unsaon man sa paggamit og sakto ang enerhiya?

Ang batasan nga nangita lang sa kahayahay;
Kasagaran sa kinaiyahan maoy nakapatay,
Unsaon man sa pagpuyo nga yano sa kanunay?

Kay kita mao ang hinungdan sa kainit,
Kita usab ang mosulbad sa kainit.

Tumanon (Ang Mga Damgo)©

Matag usa kanato adunay mga damgo.
Bisan pa gani sa gamay pa kita,
Nangandoy, naninguha na.

Apan may mga damgong lisud gyud kab-oton.
Tungod sa kapit-os sa panahon.
Apan kinahanglan nga...

Tumanon ang mga damgo
Nga atong ginahandom.
Tumanon ang mga damgo,
Mga pangandoy sa kaugalingon.

Kung dili nimo sulayan sa pagkab-ot ang gitinguha
Usahay pagmahay lang ang imong dangatan.
Maong kinahanglan nga...

Bay, Ako Na Lang©

Bay, ako na lang ang moinom sa iyang tagay.
Bay, ako na lang ang moinom sa iyang tagay...

Hubog na sab si Tatay, Suko na sab si Nanay
Si Tatay nagsusapinday na sab sa baybay...

Bay, ako na lang ang moinom sa iyang tagay.
Bay, ako na lang ang moinom sa iyang tagay...

"Dong," matud pa ni Nanay,"Ayaw'g awat sa imong Tatay,
Sa ilimnong makahubog ikaw paglikay."

Bay, ikaw na lang ang moinom sa akong tagay.
Bay, ikaw na lang ang moinom sa akong tagay...

"Dong, pasayloa ko, sa suliran puno ang utok ko,
Sa pag-inom ko daw mahikalimtan ang tanan...

Bay, ikaw na lang ang moinom sa iyang tagay.
Bay, ikaw na lang ang moinom sa iyang tagay...

Tay, hunong na pag-inom, mga problema ato tanang sagubangon...

Tay, ayaw na tawon sa ilimnon pagpaulipon.
Tay, hinumdomi nga mahal mo usab kami...