Akong Mga Higala© (Adbent)

Naamguhan ko sa nanglabayng mga adlaw
Nga kalit sila kanako nahanaw.
Daw sama sa maanindot nga bangaw
Makadiyot lang nimo nga malantaw.

Kon ugaling may pagkuwang man
Angayan lang ba nga inyong talikdan?
Ug kon ugaling dunay kasaypanan
Paludhon ba ako sa inyong tiilan?

Bisan pa man sa atong nahiaguman
Kanunay kamong sulod ning akong dughan
Ug bisan pa man niining kalisdanan
Gihangad ko sa langit ang inyong kaayuhan.

Nagpanawag ako sa akong kalisdanan
Gihuna-huna ko kamo sa mga katam-isan
Gidumdom kanunay kadtong panag-uban
Ang gasa sa panaghigala atong gisaw-an.

Higala ko, kamo akong dalangpanan
Ayaw intawon isalikway ug talikdan
Sa mga pagsulay sa atong panaghigala
Maghiusa kita, mga babag buntogon ta!

Kasakit Ug Kamatayon© (Alan - Mars)

Ang kasakit bililhon sa nga tanan
Mas daghang kasakit
Mabati's kinabuhi...

Samtang ang kamatayon
Didto wala na ang tanan...

Wala ang sakit,
Wala ang kalibog,
Wala ang pag-antos,
Wala ang pagping-it...

Wala ang katam-is,
Wala ang kapait,
Wala ang kahuyang,
Wala ang kakulang...

'Pan wala sab ang gugma natong duha
Kay wala ako, wala sab ikaw...
Wala ikaw...

Asa na kamong mga gagmayng ginoo
Ning kinabuhing
Gibatunan.

Pun-i pa'ng kasakit nga gibati,
Pun-i pa'ng pag-antos nga gisagubang...

O kamatayon... kanimo...

Ihatag na kanako ang tanang mga sakit
Nga dili matukib sa kinabuhi...
Kung gusto nimo gukda ako ug lutusa
Kastiguha ug kung mahimo pa ilansang...

'Pan kon pwede pa, ayaw sa ko og patya
Kay gusto ko pa nga magakos
Ang akong gugma...

Pabatia Ako, Awiti Ako© (Mars)

Pabatia ako sa imong mga laylay
Pabatia usab ako sa linganay
Sa imong gitarang kanhi mo nang gikaskas
Aron pagsugilon sa gugmang malaumon.

Awiti na usab ako sa atong kagabhion
Awiti sa imong mga pangindahay
Sa atong paraiso nga puno sa kalipay
Uban sa dan-ag sa buwan nga atong kauban.

Balaki sa imong mga pulong
Ug sa sugilanon sa 'tong kinaiyahan
Isinggit, isangyaw'ng kaayuhan
Bisan sa kaparutan, ahay, akong nahiaguman.

Sulati ako sa 'kong pag-inusara
Ubani sa akong kagawasan sa gugma
Tagui sa paghubo sa 'kong kamatuoran
Nga ikaw lamang may pagsabot kanunay.

Awita Ang Awit Ko© (Adbent)

Pangandoy kong awiton kini
Damgo kong imong mabati
Tinguha kong mahalad kanimo
Ki'ng awit nga mugna ko.

Apan pangandoy lang gyud diay
Kay mga nota daw mitalidhay.
Pakyas kong ipabuhagay
Kining gugma nakong giatay.

Gisuwat sa lugas sa akong mga luha
Sa palad nga hapit madugta
Namugnang awit sa hunahuna'ng
Gagubat sa taliwala.

Ki'ng awit sa akong pakigbisog
Sa gugma nga way pagkabusog.
Padayon nga naglagubo
Ikaw unta makahibalo.

Palihog lang awita ang awit ko
Pahinungod ko alang kanimo.
Pasayloa kung di ko mahimo
Hangtod karon padayong nakigbugno.

Palihog lang awita ang awit ko
Awit sa gugma ko diha kanimo.
Ug kon mahimo nang abo
Maluoy ka, awita kini sa lubnganan ko.

Ubani Unya Ako© (Mars)

Ikaw kadtong hulagway sa kaanyag,
Ang hulagway sa matuod nga paghigugma.
Ikaw ang dagway nga kanunay nakong gihangad
sa akong kagabhion nga nag-inusara.

Lauman ta kadtong langit nga atong padulngan.
Didto way pagkalaglag ang balilinhan.
Ug ang kahayag nga way pagtunod sa kasadpan,
Ipasalig kong ubanan ikaw sa imong karon ug unya.

Kung aduna man gani katapusan ang tanan
Ug mahanaw sa kalibutan nga atong agian.
Palihug na lang og dan-ag didto unya sa atong ugma
Kung aduna pa man gani, ikaw, gihapon ang akong kauban...
Ang ikauban...

Kay bisan unsa'ng dangatan didto unya sa atong ugma
Kung aduna pa man gani, ikaw, ikaw gihapon ang tanyagan...
Sa akong gugma...

Ayaw Bakwia Ang Katahom© (Mars)

Nabati ko ang kahapdos sa kasing kasing
Sa matag tuyok sa akong hunahuna diha kanimo
Nganong ikaw pa ang natanom ning pag-inusara.

Buot ko nang mulingkawas, mamuhi kanimo apan
Nasayod kung kamatayon ko lang ang mahimong bugti
kung mahilayo sa tubig ug hanging gipahulaman.

Naanad na ako, nahimo kining kabahin sa pagkatawo
Apan unsa ang mahimo ning ulipon kung imo na'ng bawion
Bisan malisod giandam ko na'ng akong kaugalingon.

Balas Sa Imong Palad© (Mars)

Pwedeng mahigugma ka sa makadaghan
Pwedeng kumkumon nimo silang tanan
Pwedeng magpa-ulipon ka
Sa imong pagkahakog.

Ingnon ko ikaw daan
Dili maangkon ang tanan sa pagdali-dali
Mga butang nalatid na'ng mahitabo
Sa insaktong higayon ug rason.

Sama nianang balas nga imong gigunitan
Dili tanan magpabilin sa iyang nahimutangan.
Bisan pa gani sa pagpanglimbasog nimo'g hawid
Mahimong mulugnot ang uban ug mangatagak.

Ug mangapalid kini sa tayhop sa hangin,
Maong pagmata na ug pilia ang angayang
Mupabilin sa imong palad.

Kay usa ka lugas lamang ako
Nga nagyaka sa imong palad.