Dili Mahimong Talikdan© (Adbent)

Sa makadaghang higayon
Imong gilutos ug buot tapuson
Nagkamang sa yuta sa kawad-on
Nalubong sa lapok,
Nagpakiluoy nga haw-ason.

Bisan pa man niining tanan
Labot ka niining akong kalibutan.
Bisan abugon man sa makadaghan
Mobalik ako nganha sa imong tugkaran.

Karon ako nagpahilayo
Gibalong kasakit ug kasubo
Buntogong kahuyang nga nagtago
Giyahan unta sa langit,
Ako nangamuyo.

Buot ko man nga ikaw hikalimtan
Ilubong sa hingpit kadtong kapakyasan.
Apan bisan pa man sa 'kong nahiaguman,
Ikaw, dili og dili g'yud mahimong hitalikdan.

Benuristik© (Mars)

Wala ako mangandoy nga awitan mo,
Wala ako magdamgo nga iduyan mo,
Sa mga laylay
Sa akong pagkahinanok,
Igo na kanako nga anaa ka diha...

Bisan dili ko ikaw magakos
Bisan dili ko ikaw mahagkan
Bisan dili ko mahikap ang kamatuoran...
Igo na kanako ang mga pulong
Ug kahayag nga nagbinugtong
Dan-ag sa bag-ong kagabhion...

Wala ako mangandoy nga tutokan mo,
Wala ako mangayo nga sublian mo,
Sa mga pulong nga nagbaga
Sa akong kasingkasing,
Igo na kanako nga anaa ka diha...

Puol, Labad, Ug Balak© (Mars)

Puol gamay, labad ug dyutay
Sige ta'g balik balik, balak balak
Padayag sa atong butbot
Padugang sa pusta haron ingnong hawod.

Hahay, kanus-a pa kaha
Kitang tanan masayod,
Nga nakadugang kita sa gubot,
Naka-ali kita sa mga dalan
Mura sad ug mga sagbot.

Lalag na ug nangalarag,
Nagpalayo ang kalunhaw,
Naanod sa pangidaron
Nga gihagit sa adlaw,
Ayaw tuguti ang kaulaw.

Usahay maka-ingon lagi ako
Mas lami paminawon
Ang linaw nga baybayon.
Kanang wala gyuy balud
Bisan daghan ang gapnod,
Walay sulog nga moanod.

Alang Sa Taga-Kalubihan© (Mars)

Gisapnay ninyo kanunay
Ang mga pag-amping.

Gibuligan sa pag-amuma
Gitugutang mahimong lanog nga pulong.

Ilawom niining kalubihan
nga sa kanunay nakig-uban.

Sa mga nag-inusara'ng pakigbisog
Ug wala'y panon nga sarang tultulon,

Dako'ng pasalamat sa kalubihan
Nga nihatag sa tipik nga higayon,

Haron kini nga pundok sa mga pulong
Mahimong lanog nga lugaynon.

Diin mabati sa mga bungol
Na kaayong kasing kasing,

Nga nitikig na ug nigahi
Tungod sa pagkaulipon.

sa mga pulong sa kasikbit nga mga dapit
ug midaugdaog sa pagkagamay niini.

Pulong pa ni Bay Uray
Sa iyang mga awit,

Nga latagawtawan
"Dako ang iyang Gugmahanong Buwan!"

Bakaki Na Lang©

Kung nawala na'ng imong gugma
Ayaw lang sa pagsaba
Kay di ko pa makaya
Kung ugaling mobiya ka.

Makahulat ka pa unta
Og daghan pang mga takna
Sa di ka pa motug-an
Sa tanang sekretong imong gitagoan.

Sigurado gayud
Nga ako mabuang sa hilabihan.
Kung imo lang akong pakalitan
Sa pagsulti sa matuod
Nga sulod sa imong dughan.
Ma'y pa mamakak ka na lang
Kay dili pa ako andam.

Dugay na 'kong nakabantay
Nausab na'ng imong panagway.
Nawala na ang kanhiay
Mga matang puno sa kalipay.

Lahi na sab ang pahiyom
Di na sama sa kagahapon
Nawala na ang kainit
Sa imong halok
Ug gakos nga hugot.

Asa Kaha Kita Dalha© (Mars)

Asa kaha kita dalha
Sa atong mga damgo?
Asa kaha kita sugata
Sa pakiglimbasog?

Dihay higayon usa kita
Apan dili ikalimod
Nga dili kita mahi-usa pa
Sa tan-aw sa mahusgahong mga mata.

Apan ingnon, ingnon ko ikaw,
Andam na akong puy-an
Ang mga damgo, damgong naumol
Niadtong usa ka gabiing miawit ta.

Miawit mga kasing kasing
Sa kalipay nga hilabihan.
Dalha ako sa mga sumpay
Sa kahigayunan.

Sa Mga Bukton Mo© (Adbent)

Sa mga bukton mo
Nabati ko ang matuod nga pagpangga
Pagbati nga dugay ko nang gipangita
Og dinhi mo kanako gipakita….

Sa mga bukton mo
Nabati ko ang matuod nga paghigugma
Pagbati'ng tiunay og walay paglubad
Busa ikaw usab akong gimahal…

Sa mga bukton mo... malooy ka
Sa mga bukton mo... papahulaya ako
Sa mga bukton mo... alalaya
Ug palihog lig-ona ako...

Sa mga bukton mo
Nabati ko ang matuod nga kalipay
Pagbati nga dili mahimong isalikway
Binbinon ko hangtod sa ikamatay…

Sa mga bukton mo
Nabati ko ang matuod nga panaghigala
Pagbati ning dughan nga walay sama
Ug ampingan ko kini nga puno sa gugma…

Sa mga bukton mo
Nakita ko ang matuod kong pagkatawo
Gialim mong samad nga sa dughan kong nagsubo
Gisapnay ang mga luha sa akong pagbakho.