Ang Maglalangyaw© (Adbent)

Bug-at nga desisyon ang gipili
Aron maharuhay ang kinabuhi
Bisan kamingaw ang maong bugti
Molampos lang sa gilatayang pisi.

Ang mga gibati sa kaugalingon
Kini dili nimo panumbalingon
Alang sa imong mga biniyaan
Antoson mo na lang kining tanan.

Dili tiaw-tiaw ang paglangyaw
Hataas nga dalan imong ginalakaw
Madag-umon man ang imong nahagdaw
Malantaw mo rang bidlisiw sa adlaw!

Nahisama ka sa piniriso
Didto sa hawla nagpuyo
Uhaw sa duaw sa mga mahal mo
Mainit nga pagbating daw kalayo.

Sa pag-inusara sa kagabhion
Giihap mong mga bitoon
Dungan sa pagkislap ikaw miingon
Usa kaninyo ako rang maangkon... puhon...

Dili gayod sayon imong pagbiya
Apan kalisdanan ibaliwala
Pag-ampo nga'ng Diyos na ang bahala
Inubanan sa kakugi'g mga paninguha.

Duka Bersus Kalaay© (Adbent)

Gibati ko karon ang kalaay
Dinhi sa opisina nagtulo ang laway
Nagamug-ot akong panagway
Buot makig-hadla sa mga panuway.

Gilingaw ko nalang akong kaugalingon
Aron sa kalaay dili ako maulipon
Dakong bugno nga akong sagubangon
Nga angayan kong pagabuntugon.

Pastilan, pastilan, pastilan ang kinabuhi
Kinahanglan mag-antos aron mabuhi
Apan ngano man usab ang kinabuhing hayahay
Kulang sa katam-is, kulang usab sa kalipay...

Tibuok adlaw nga nakig-atbang
Sa mando og sugo nagpaabot lang
Nagsulat aron panahon di masayang
Inig singgit sa amo aron di usab makugang.

Kalaay og kamingaw ang kontra
Kung magpadaog, magpaulipon ka
Lamyon ka niini og ikaw matumba
Makawang lang ang imong paninguha.

Luyo Sa Entablado© (Adbent)

Sa matag gula ko sa entablado
Giduyogan sa daghang adorno
Matag-suok gilukop ko og paso
Abiba'g pagdayeg ang naangkon ko.

Pagpaambit sa abilidad ug talento
Mipahilak, mipakatawa's mga tawo
Sa kalingawang nahatag ko didto
Kalipayng gibati naghari's dughan ko.

Sa matagtiklop sa tabil sa maong entablado
Makita mo sa daplin usa ka anino
Didto sa suok nagabakho
Puno sa kasakit akong pagkatawo.

Buot ko mang hunongon kining tanan
Dunay nagtukmod ug gipaundayonan
Padayong gikab-ot ang mga kabitoonan
Bulawan nga entablado akong gipuy-an.

Didto luyo sa maong entablado
Sa matuod nga lumba ako nakibugno
Sa walay pagtakuban og pagtago
Nanglimbasog aron kadaugan maangkon ko!

Matuod Nga Kalipay© (Adbent)

Sa nangaging mga adlaw
Kaugalingon ko nagpakalingaw
Wala na panumbalinga
Ang akoang tumang kamingaw
Nahikatulog nga pagbati pirmi nang gatukaw.

Walay oras nga giusikan
Matag hagtok sa orasan
Dunay mga pulong akong gibuhian

Walay oras nga giusikan
Matag pitik sa akong dughan
Lain-laing mga mugna ang mahuna-hunaan.

Wala ko gayod kini mabantayi
Ang pagsubang sa adlaw og pagsalop niini
Didto sa akong lawak lamang ako nagpakabuhi
Sa paglanog sa tingog, balumbong ang bugtong saksi.

Dinhi ko nakita ang kalipay
Nga sa galamhan ko nakahupay
Alang kaninyo kining akong ginahikay
Sa kinasing-kasing og sa walay pagkalaay
Tungod sa panaghigala nato nga unta molahutay.

Salinsing Sa Dahong Laya© (Adbent)

Ang kaniadtong berding dahon
Mga yamog kanunayng nagtugdon
Bisan ang makolor nga alibangbang
Kanimo pirming nagpaatbang.

Apan sa imong pagkalaya
Wala na sila motimbaya
Gipaabot lang ang pagtagak sa yuta
Og didto kutkuton hangtod mawala.

Salinsing, salinsing
Salinsing sa dahong laya.

Miabot gyod ang gikahadlokan
Sa paghapak sa hangin napukan
Didto sa yuta nahagba
Gilamoy hangtod nga nadugta.

Apan sa imong pagkapukan
Dunay mihulip sa nahimutangan
Salinsing sa bag-ong paglaom
Sa pagbuklad sa mga bulak nga matahom!