Di Na Makalupad©

Morag langgam
Nga di na makalupad
Napiang sa imong pagbalibad
Sa gugma ko
Nga walay paglubad
Nga kanimo dugay na untang
Naghulat.

Kay kaniadto sa mga bata pa kita
Daw sa nabihag na sa imong kaanyag
Hangtud karon ikaw lamang gihapon
Ang nag-angkon sa gugma kong
Mapailubon.

Apan matud mo duna nay tag-iya
Sa kasingkasing mo
Duna nay nakauna.
Bisan og sakit dawaton sa hingpit
Apan ako nagpabilin nga...

Kay lagi ikaw lang ang gitinguha
Mga mata wala nay lain pang makita
Kanunay naghandum
Nga ugma puhon
Makapanag-iya kanimo ako gihapon.

Gisugot©

Gikutasan sa pagtikang
Padulong sa imong gisak-an
Kay napuno ang akong dughan
Sa kakulba ug kahinam.

Miingon ka kagahapon
Nga tubagon na nimo karon
Ang gugma ko nga naulipon
Sa kabuotan mo'g katahom.

Apan wala ka kuno sa inyong balay
Imo ba akong gibiay-biay?
Abi kog maangkon na'ng kalipay
Apan kanako ikaw milikay.

Gitunolan ako sa imong tagbalay
Sulat nga nagburot sa sobreng gamay
Gibukhad ko kini sa hinayhinay
Ug maoy nakita'ng imong hulagway.

Gibali ko kini, gisusi ang luyo
May gisulat ka nga di ko katuo
Matud nimo sukad pa kaniadto
Gitagana nang gugma mo kanako.

Mora kog gibayaw sa kalangitan
Milagubo pagkusog ang akong dughan
Labina sa imo nga gitug-an
Nga mahal mo usab ako's hilabihan.

Gipadayon pagbasa'ng imong sulat
Nagpasalamat ka's akong paghulat
Naglaum ka nga di kita magkabulag
Ug atong gugma di unta masaag.

La...la...la...
Daghan kaayong salamat... Uyab na ta!

Awit Sa Kinabuhi (Pahinungod Kang Bay Uray)© (Adbent)

Usa siya ka yanong tawo
Nga bag-o lang nahimamat ko
Kauban sa iyang amigo
Ang gitara nga maayong pagkatono.

Matag kaskas sa mga kwerdas
Ang mga nota iyang gipabanlas
Inubanan sa iyang tingog
Nindot nga awit ang atong madungog.

Dayon kamo mga higala
Awit sa kinabuhi saw-an ta
Ang kagul-anan isalibay na
Angayan lang kita nga magsadya.

Dayon kamo mga higala
Awit sa kinabuhi saw-an ta
Ang panagbingkil kalimtan na
Maangkon ang kalipay ug gugma.

Pamatia ang nagkadaiyang mga obra
Duyog sa iyang mga mugna
Matag lanog sa mga nagparada nga letra
Ang iyang gidalit hala tagamtama.

Siya tinuod tang higala
Andam kanunay motimbaya
Ginamit ang iyang gitara
Sa kagul-anan iyang lipayon ta.

Akong Mga Higala© (Adbent)

Naamguhan ko sa nanglabayng mga adlaw
Nga kalit sila kanako nahanaw.
Daw sama sa maanindot nga bangaw
Makadiyot lang nimo nga malantaw.

Kon ugaling may pagkuwang man
Angayan lang ba nga inyong talikdan?
Ug kon ugaling dunay kasaypanan
Paludhon ba ako sa inyong tiilan?

Bisan pa man sa atong nahiaguman
Kanunay kamong sulod ning akong dughan
Ug bisan pa man niining kalisdanan
Gihangad ko sa langit ang inyong kaayuhan.

Nagpanawag ako sa akong kalisdanan
Gihuna-huna ko kamo sa mga katam-isan
Gidumdom kanunay kadtong panag-uban
Ang gasa sa panaghigala atong gisaw-an.

Higala ko, kamo akong dalangpanan
Ayaw intawon isalikway ug talikdan
Sa mga pagsulay sa atong panaghigala
Maghiusa kita, mga babag buntogon ta!

Kasakit Ug Kamatayon© (Alan - Mars)

Ang kasakit bililhon sa nga tanan
Mas daghang kasakit
Mabati's kinabuhi...

Samtang ang kamatayon
Didto wala na ang tanan...

Wala ang sakit,
Wala ang kalibog,
Wala ang pag-antos,
Wala ang pagping-it...

Wala ang katam-is,
Wala ang kapait,
Wala ang kahuyang,
Wala ang kakulang...

'Pan wala sab ang gugma natong duha
Kay wala ako, wala sab ikaw...
Wala ikaw...

Asa na kamong mga gagmayng ginoo
Ning kinabuhing
Gibatunan.

Pun-i pa'ng kasakit nga gibati,
Pun-i pa'ng pag-antos nga gisagubang...

O kamatayon... kanimo...

Ihatag na kanako ang tanang mga sakit
Nga dili matukib sa kinabuhi...
Kung gusto nimo gukda ako ug lutusa
Kastiguha ug kung mahimo pa ilansang...

'Pan kon pwede pa, ayaw sa ko og patya
Kay gusto ko pa nga magakos
Ang akong gugma...