Photobucket ---WAY LINGAW? NAOG sa pinaka-UBOS niining PAYAG--- 3DFlags
Custom Search

Subscribe Now: Feed Icon

Saturday, February 28, 2009

Walay Kinutuban©

Saturday, February 28, 2009 0

Walay kinutuban ang atong panag-uban
Panaghigalaay magpabilin sa gihapon
Sa kanunay
Dili makababag ang unsa man nga suliran
Panag-inunongay sa kinabuhi
Makagaan, makapahupay.


Dili tanang higayon managsama
Usahay sungogon kita sa mga problema
Apan diha sa gugma ug kaayo'ng
Giambitan natong duha,
Dili madaug ang paglaum sa mga kabalaka.

Walay gahum kanato ang kamatayon
Buhi kanunay ang gugma nga atong naangkon.
Bisan unsa pa man ang dangatan
Sa atong kalibutan
Dili mahimulag ang akong kasing-kasing
Sa imong dughan.


Thursday, February 26, 2009

Feli©

Thursday, February 26, 2009 0

Sa akong pag-inusara
Gihandom ko ikaw.
Ang katam-is sa atong kagahapon,
Gihanduraw ko sa matag adlaw.

Apan wala na ikaw
Mipanaw sa layong dapit.
Unsaon man paghupay
Sa akong kamingaw.

Bisan gihilak ko na ang tanan
Dili mohunong ang akong dughan
Sa pagsangpit sa imong ngalan
Walay undang sa adlaw'ng tanan.

Bisan giampo na sa makadaghan,
Bug-at gihapon ang akong dughan.
Ang kasubo walay utlanan
Hangtud ikaw pag-usab akong makit-an.


Hangtud ikaw mobalik sa akong kiliran.


Wednesday, February 25, 2009

Pas-anon Kong Kalibutan©

Wednesday, February 25, 2009 0


Pas-anon kong kalibutan
Aron mapamatud-an
Gikan pa sa sinugdanan
Ang gihigugma, ikaw lamang.

Kab-oton ang kabituonan
Aron imong tuohan
Way lain akong padaygan
Ikaw lang.


Ikaw lang ang higugmaon ko
Tugyanan sa kinabuhi ko
Patalinghogi na ang gipangayo ko
Aron maangkon ko na
Ang gugma mo.

Ikaw ang bugtong hinungdan
Nga nagpadayon pagtuyok akong kalibutan
Unta moabot na'ng katumanan
Sa ginamithing bahandi
Ning akong dughan.


 
Design by Pocket